ასევე წარმოებს კვლევები ეკოსისტემების რადიაციული უსაფრთხოების ხელშესაწყობად, რაც ითვალისწინებს რადიაციული და მომიჯნავე ტექნოლოგიების აპლიკაციების შექმნა/მოდიფიცირებას და შესაბამისი თეორიული გათვლების უზრუნველყოფას.

თერმოქიმიის მიმართულებით (პასუხისმგებელი - მ.ხუნდაძე) კვლევები ითვალისწინებს ეფექტური თვისებების მქონე მრავალკომპონენტიანი ოქსიდური მასალების მიზანმიმართულ ძიებას და მათი მიღებისთვის ოპტიმალური ტექნოლოგიური პროცესების შემუშავებას, საბაზისო ოქსიდური სისტემების თერმოდინამიკური და თერმოფიზიკური თვისებების შესწავლით. ლაბორატორიაში, საკუთარი გაზომვებით მიღებული და, აგრეთვე, ლიტერატურული მონაცემების საფუძველზე, შექმნილია რთული ოქსიდების საბაზისო თერმოდინამიკური პარამეტრების ელექტრონული, უწყვეტად განახლებადი ბანკი.

ლაბორატორიაში მნიშვნელოვანი ადგილი ეთმობა საკვლევი კომპოზიციებისათვის დამახასიათებელ სტრუქტურულ, მაგნიტურ, ელექტრულ და სხვა სახის ფაზური გარდაქმნების და ანომალიების გამოვლენას და მათ ენერგეტიკულ დახასიათებას, აგრეთვე თერმულ მახასიათებლებზე ნანოსტრუქტურული მდგომარეობის გავლენის ასახვას. მიღებული მონაცემების ერთობლიობა ქმნის შესაძლებლობას, რომ მიზანმიმართულად შევარჩიოთ კომპოზიციური ცვლილებები და ენერგოდამზოგავი ტექნილოგიური პროცესები.