ცირკულარული ეკონომიკის კონცეფცია რომელიც წარმოადგენს რევოლუციურ გადახვევას ტრადიციული „ამოიღე-აწარმოე-მოიშორე“ მოდელიდან მიზნად ისახავს პროდუქტების, კომპონენტებისა და მასალების სარგებლიანობისა და ღირებულების ოპტიმიზაციას მათი მიმოქცევაში რაც შეიძლება დიდხანს შენარჩუნების უზრუნველყოფით. სწორედ ასეთი მიდგომებით ხელმძღვანელობს ჩვენი განყოფილება და ავითარებს ისეთ პროექტებს რომლებიც ემსახურება გარემოზე ზემოქმედებისა და რესურსებზე დამოკიდებულების შემცირებას მეორადი ნედლეულის, ნამუშევარი კომპონენტების და ნარჩენი მასალების გამოყენების ხელშეწყობის გზით.

ჩვენს განყოფილებაში, მანგანუმის შემცველი მეორადი ნედლეულის სხვადასხვა მეთოდით გადამუშავებით ვახორციელებთ მაღალი სისუფთავის მანგანუმის სულფატის მონოჰიდრატის მიღებას რომელიც გამოიყენება ლითიუმ იონური ბატარეების საკათოდე მასალის მწარმოებელ კომპონენტად. ჩვენთან ხდება ნამუშევარი ბატარეების უტილიზაციისა და საწარმოო მნიშვნელობის მქონე პროდუქტების (ლითიუმი, მანგანუმის დიოქსიდი) ამოღების ტექნოლოგიების დამუშავება. ასევე პრიორიტეტულია ჩამდინარე საწარმოო წყლების გაწმენდა და მათგან ლითონების ამოღების მეთოდების შემუშავება.

გამოსარჩევია არაორგანული პოლიმერების და ცვეთამედეგი მასალების სინთეზის მიმართულებით გაწეული სამუშაოები. წყალბადის წყალხსნარებიდან გენერირების (წყალბადის ენერგეტიკა) სამუშაოები ასევე არის მოქცეული ჩვენი განყოფიელბის სამეცნიერო ინტერესის სფეროში.

გამოყენებითი ქიმიის განყოფილების პრიორიტეტებში შედის საგანმანათლებო პროცესში აქტიური ჩართულობა. ჩვენთან სისტემატურად გადიან სტაჟირებას და ასრულებენ საბაკალავრო სამეცნიერო კვლევებს თსუ-ს და საქართველოს აგრარული უნივერსიტეტების სტუდენტები. ჩვენთან პრაქტიკა გავლილი სტუდენტები დასაქმებული არიან სპეციალობით ან აგრძელებენ სწავლას როგორც საქართველოში ისე ქვეყნის ფარგლებს გარეთ ევროპის მაღალ რეიტინგულ პროგრამებზე.

განყოფილებაში მუშაობს 26 კვალიფიციური თანამშრომელი. აქედან 6 მთავარი, 12 უფროსი და 8 მეცნიერ თანამშრომელი.