2025 წლის 8 ოქტომბერს თსუ რ.აგლაძის არაორგანული ქიმიისა და ელექტროქიმიის ინსტიტუტმა მასპინძლობა გაუწია დოქტორ პაულა ფრაგა გარსიას, რომელიც წარმოადგენს მიუნხენის ტექნიკური უნივერსიტეტის (TUM) ბიოსეპარაციის ინჟინერიის კათედრას. ვიზიტი განხორციელდა პროექტის ფარგლებში — „ვერცხლშემცველი ჰუმინის მჟავებზე დაფუძნებული ბიონანოკომპოზიტები, როგორც ანტიბაქტერიული და ანთების საწინააღმდეგო აგენტები“, რომლის ხელმძღვანელია დოქტორი სპარტაკ ხუციშვილი, ხოლო დაფინანსებულია საქართველოს ეროვნული სამეცნიერო ფონდის მიერ. ვიზიტის ფარგლებში დოქტორმა ფრაგამ წაიკითხა მოხსენება თემაზე — „მატარებელი მასალისა და სამიზნე თვისებების გავლენა ბიოსეპარაციის ინჟინერიაზე“.
პრეზენტაცია დაიწყო მიუნხენის ტექნიკური უნივერსიტეტის ზოგადი ინფორმაციისა და ბიოსეპარაციის ინჟინერიის კათედრაზე მიმდინარე კვლევების მიმოხილვით.დოქტორმა ფრაგამ წარმოადგინა მაგნიტური ნანონაწილაკების ძირითადი ტიპები, რომლებიც ფართოდ გამოიყენება მის კვლევით ჯგუფში, ხაზი გაუსვა მათ ფიზიკურ-ქიმიურ თვისებებს და ბიოსეპარაციის პროცესებში მათ მნიშვნელობას. მოხსენება მოიცავდა ექსპერიმენტულ მონაცემებს ამინომჟავების, ცილებისა და სხვა ბიომოლეკულების ხსნარებში ქცევის შესახებ, აგრეთვე მათი ადსორბციული თვისებების განხილვას იზოთერმული ანალიზის საფუძველზე. გარდა ამისა, დოქტორმა ფრაგამ გააფართოვა პრეზენტაციის თემატიკა და ისაუბრა ელექტროსორბციულ პროცესებზე, წარმოადგინა ცილების განცალკევების შედეგები მეტალიზებული მემბრანების გამოყენებით და განმარტა, თუ როგორ შეიძლება მოლეკულების შეკავშირება და გამოყოფა განხორციელდეს ელექტრული პოტენციალის ზემოქმედებით.
მოხსენების შემდეგ ინსტიტუტის თანამშრომლებმა დოქტორ ფრაგასთან ერთად განიხილეს ფიზიკური და ქიმიური ადსორბციის მექანიზმები, აგრეთვე სხვადასხვა მოვლენები, რომლებიც მიმდინარეობს წყალხსნარებში. რამდენიმე კითხვა შეეხო იმ მეთოდოლოგიებს, რომლებიც გამოიყენება კოლოიდური სისტემების თვისებების უკეთ შესასწავლად.
აღსანიშნავია, რომ ეს არ ყოფილა დოქტორ ფრაგას პირველი ვიზიტი აგლაძის ინსტიტუტში — ის ესტუმრა 2024 წლის სექტემბერში მოხსენებით თემაზე „ადსორბცია და მაგნიტური განცალკევება ბიოტექნოლოგიაში მოლეკულების აღდგენის მიზნით“.
პირველი ვიზიტი დაეთმო ნარევებისა და რთული სისტემების (მაგალითად, მარილიანი მიკროალგების) ქცევის შესწავლას მაგნიტურ ნაწილაკებთან ინკუბაციისას.ასევე, დოქტორმა ფრაგამ ისაუბრა მაგნეტიტის მადნების დაფქვასთან დაკავშირებულ სირთულეებსა და შესაძლებლობებზე და წარმოაჩინა, როგორ განსხვავდება ადსორბციული პროცესების შედეგები გამოყენებული მაგნიტური მასალის თვისებების მიხედვით.
დოქტორ ფრაგას ლექციებმა და დისკუსიებმა მნიშვნელოვანი წვლილი შეიტანა ბიოსეპარაციისა და მაგნიტური განცალკევების თანამედროვე მიდგომების გაგებაში — როგორც ლაბორატორიულ, ისე ტექნიკურ დონეზე. მისი ვიზიტი კიდევ უფრო გააძლიერებს თანამშრომლობას მიუნხენის ტექნიკურ უნივერსიტეტსა და აგლაძის ინსტიტუტს შორის.
